Biodata
Gamal sigat betubuh tegap, Eddie tu siku penanyi lagu Iban ti ngembuan penemu, kaul enggau pementas ati ti jarang bisi dikembuan penanyi bukai. Taja iya bebansa Kenyah tang ba penemu Eddie kitai tu nadai dibida. Kuasa pengerembai jual VCD di Sarawak tu endang bepanggai ba pemayuh orang ti meretika jaku Iban. Nya alai nadai salah Eddie sama besemekih besaup nyungkakka industri musik Iban.
Eddie ada taun 1977 ba sebuah rumah panjai bansa Kenyah di Sg. Asap Belaga. Sida Eddie bisi lapan iku diri menyadi. Eddie anak ke lima. Eddie terubah besekula di SRK, Asap, Belaga, udah nya pindah ngagai SRK Long Bulan, nampung ngagai pom tiga di SMK Belaga. Eddie nampung pelajar ngagai pom lima di SMV Sibu. Maya di menua din, Eddie rinduka pengawa nginti, nginau jelu enggau ngasu beburu. Enda tentu ngalitka ati laban menyadi kitai bansa Kenyah endang iya orang ke chakah idup dalam kampung. Turun darah Eddie endang orang ke siru ke pendiau dalam babas. Jauh nyamai ari di mengeri, ribut ke disirut chukup beresi, ai dipandi pen chukup chiru.
Sebedau nyadi penanyi, Eddie kala gawa nyadi polis. Wow! Enda disangka-sangka iya? Patut meh enda takut bemain enggau senapang lebuh maya di rumah panjai. Bujang polis tu suba. Eddie kala nyadi polis sepengelama dua taun. Iya terining di PULAPAH di Negeri Sembilan. Maya nyadi polis Eddie aktif ba bagi lumba enggau main. Eddie kala nyadi pengari Polis dalam main bol. Eddie mega kala diambi gawa nyadi pegawai teknikal lumba Commonwealth. Empa pemendar Eddie bemian bol alai iya kala bebadi patah kaki lebuh bemain ngarika polis. Nya kitai meda litan ba kaki Eddie ti kala diperuti. Nasit Eddie enda singkung. Pengawa bukai ke kala dikereja Eddie suba nyengkaum nyadi pelayan ba restoran hotel. Endang ukai nyamai mega pejalai pengidup Eddie Kuwing, laban iya mega ukai anak orang ti kaya. Iya turun orang merinsa, diau di rumah panjai, bekebun betupi, enggau bumai. Nya alai Eddie enda mudah sumbung, ngeninggika diri taja pan udah tebilang. Iya seruran ngembuan penemu ti ensuruk.
Eddie rindu belagu kenyau ari iya agi ba bangku sekula maya iya agi primeri tiga kelia. Eddie mega suah enggau orang bepekit lalu suah mega bulih nombor ba semua bengkah pekit ke dipasuk iya. Nambahka nya Eddie mega landik amat ngajat. Ngajat bansa Kenyah ti endang udah tebilang di serata dunya. Apai enggau indai Eddie mega orang ke endang landik ngajat. Ba penemu kitai Iban ke macha sentang tu, engka kitai enda alit ati laban bansa Kenyah endang landik ngajat. Tang anang mega kita saru, bala Kenyah pen mayuh enda landik ngajat lebih-lebih agi sida ke diau di mengeri.
Album Eddie keterubah dikeluarka dalam taun 1997. Album ke diberi nama Semalam Di Kaki Lima. Nyentukka sehari tu pen lagu nya agi mengkang dikerinduka bala peninga. Tanya aja, sapa enda nemu lagu Semalam Di Kaki Lima? Nyentukka unggal Sedau ti enda kiruh belagu pan nemu lagu nya enggau apal. Lagu ti manah endang iya teguh ba ati peminat. Munyi ku Eddie, album tu suba endang ulih jual amat-amat taja iya empu enda dipadahka penyampau ti dijual.
Dalam taun 2003 Eddie pindah ari TBC ngagai LUH. Ukai ketegal enda puas ati tauka ringat ngagai TBC tang nyau ngiga asai, ku Eddie besabar jaku diri. Ba LUH Eddie sain kontrak pengelama lima taun. Ba LUH Eddie ukai semina nyadi rekoding artis tang meh lalu gawa tetap. Eddie nyadi orang ke ngedit video klip bala penanyi di LUH. Eddie ukai semina pandai bemainka perengka musik baka gitar tang nyerangkum pengawa bukai mega. Eddie kala betarak penemu ngaga video editing ba palan pematih FINAS di Kuala Lumpur. Latih nya nyengkaum chara ngambi video, nyaga konti, bakani chara nulis skrip, ngaga cherita kelulu(drama) sereta mayuh agi ke bukai. Diatu mega Eddie benung ngansah penemu diri ba pengawa mixing, treking enggau mayuh chara bukai ke enda ditemu kitai bala peninga. Pengawa ngerikot lagu tu ukai pengawa ke nyamai iga. Mayuh macham pengawa ke enda tau enda ditengah. Kitai ke ninga nyamai meh, pasang aja lagu, peda aja video. Enti enda manah, bantah! Tudah ke ngaga, bendar ngempuk untak!.
Eddie mega enda kala belalaika sapa diri empu ke bendar. Eddie enda kala ngumbai diri bujang taja peminat mayuh ngumbai iya bujang. Terus terang madah munyi ku Eddie, nyamai agi ngambi orang nemu lalu enda mayuh laba ngagai kitai. Eddie jadi enggau Lila Manchal, lalu diatu udah bisi dua iku anak lelaki. Bini Eddie endang amat mentas tambah mega bajik gamal. Enti diundi baka di menua Holywood din, Eddie enggau Lila tau bulih gelar ‘the happiest couple’ naka ke diatu. Basa seduai melaki bini enggau pangan diri endang berupai betanggam rat.
